財經界十大廢話之首 (舊文新編)

有阻力﹗

根據周星馳電影﹐十大武器之首係﹕摺凳。

咁喺財經界﹐十大廢話之首係乜呢﹖我會話係﹕有阻力。

問大市可以講﹐問個別股票又可以講。

示範﹕

問﹕“大師啊﹐恆指點睇啊﹖”

答﹕“唔……22,000點有阻力。”

問﹕“大師啊﹐2628又點睇呢﹖”

答﹕“唔……36.50有阻力。”(留意﹕五毫就係五毫﹐唔係四毫九﹐大師即係大師﹗)

你諗諗﹐你喺報紙﹑電視﹑電台﹐遇過幾多次呢三個字﹖你再諗諗﹐有幾多人會深入考究吓呢三個字嘅真正意思﹖

有阻力﹖梗有㗎啦﹐讀過中學物理都知﹐空氣都有阻力㗎喎﹗

我哋每日聽到好多講法﹐只要深入研究吓﹐你會發覺好荒謬。RSI上到80喇﹐超買啦﹐沽啦﹐沽啦。RSI跌到20喇﹐超賣啦﹐入貨﹐入貨。其實RSI條公式有幾複雜啫﹖你睇吓個數字點計出嚟﹐先決定係咪真係有所啟示啦。

哎呀﹐今次唔係講RSI﹐講番“有阻力”。 呢三個字聽起上嚟夠晒pro(專業)﹐而且又一定唔會錯﹐好使好用﹐財演最鐘意講。但係﹐年年講﹐日日講﹐我就係無聽過有人講到底有幾阻﹖你有無聽過﹖

咁到底有幾阻呢﹖

有幾阻﹖

 “有阻力。”呢句話我認為係財經界嘅十大廢話之首。

有好多廢話﹐你又講﹐佢又講﹐人人都講﹐講得多﹐聽得多﹐習以為常﹐無人深究﹐於是就好似變咗道理。

台上專家講一句﹕“有阻力。”

台下觀眾點頭稱是﹐感嘆道﹕“啊呀﹐真係有阻力。”

人人都明﹐係我唔明﹐唯有問問﹕“阻力嚟自邊度﹖阻力有幾大﹖”

“你都痴鬼線。問埋啲無乜謂嘢。”坐我隔離個師奶話﹕“咪鬼嘈我啦。等陣專家俾冧巴㗎喇。”

係﹐係我錯。師奶要攞冧巴﹐目標明確﹐我唔應該嘈鬼住晒﹐但我唔係痴鬼線。

你去睇醫生﹐醫生幫你量血壓。

醫生話﹕“你有血壓喎。”

生勾勾嘅人就梗係有血壓啦﹐咁係高定低呀﹖如果個醫生乜都唔答﹐淨係留低“有血壓”呢三個字﹐你收唔收貨先﹖

你諗諗﹐“有血壓”同“有阻力” 呢兩句話本質上有乜分別﹖我每次睇電視見到乜乜研究部董事﹑物物策略師(電視見到嗰啲百份之九十係title inflation﹐遲啲再踢爆。) 話咩嘢咩嘢價有阻力﹐幾多幾多點又有阻力﹐我心裡都媽聲連連(有時係媽出口﹐罪過﹐罪過。)。唔係吓哇﹐日復日﹐年復年﹐都重係呢啲bullshit﹖講 嘅有問題﹐傳媒都要檢討吓。

雖然我唔知專家口中嘅“阻力”所指為何﹐但係我就有自己嘅見解﹐就等我野人獻吓曝啦。

個別股票嚟講﹐上升阻力不過就係排緊隊嘅沽盤。舉例﹐而家匯豐$86.00有40,000股排緊沽﹐咁要升破$86.00嘅阻力咪 係$3,440,000.00($86.00 X 40,000)囉。你有無$3,440,000.00﹖如果有﹐掃晒40,000股﹐個價就升㗎啦。再舉例﹐而家匯豐$86.00有20,000股排緊沽 ﹐下一口價係$86.05有4,000股排緊﹔如果你問升穿$86.05嘅阻力阻力係幾大呀﹐咪就係$2,064,200.00囉。阻力絕對係可以好具體 咁答到你﹐但係答到又點呢﹖現實市場係不斷有新盤﹐又不斷有人取消盤﹐我啱啱答完你﹐轉頭個阻力就唔同咗。

好喇﹐講埋大市。一般我哋講大市﹐其實只係講緊個指數。指數嘅上升阻力咪就係嗰渣成份股嘅沽盤囉。要知個阻力都可以﹐計得複雜啲啫。不過﹐都係嗰句﹐現實市場不斷有新盤﹐又不斷有人取消盤﹐啱啱計到個阻力﹐轉頭已經變咗喇。

“上升阻力”同“下跌阻力”(或曰﹕支持) 只係正反兩面﹐應該唔使我再解釋喇掛﹖

睇到呢度﹐可能有人會問﹐知道呢啲又點呢﹐何況你都話個阻力成日都變動緊。

第一﹐知道阻力係無時無刻變動緊﹐你就知道大部份專家口中嘅某個阻力其實都不太可靠。

第二﹐阻力係源自買盤同沽盤兩邊﹐而打破阻力嘅就係市場參與者手上嘅錢。現貨市場上﹐價格嘅變動只係買賣雙方拉鋸嘅結果。你一定要清楚明白呢點﹐先好參與期貨市場。

第三﹐既然打破阻力嘅係錢﹐錢多自然著數啲。如果錢夠多﹐有人打莊﹐又搵齊人做媒﹐意味啲乜呢﹖

第四﹐無第四喇﹐你班信壇友仔個個都非等閒之輩﹐自然可以舉一反三﹐悟到其他道理。

<財經界十大廢話之首>寫完﹐歡迎你提名其餘九句。

噢﹐如果下次再聽到有人話“有阻力”﹐你不妨問吓佢﹕“係咩﹖咁有幾阻呀﹖”