(轉貼) 無知校長要移民 作者﹕彭志銘

唔覺意睇到本地一份周刊的《老總手記》，佢識得一個校長，話見到演藝學院畢業生在畢業禮上向監禮的「校監」所作出無禮的舉止，很不是味兒，並覺得將來的香港，若由這類下一代棟樑繼承，肯定無運行，所以，該痛心疾首的校長話會考慮移民喎！

哦！校長！請問移民去邊呢？唔該單聲！其次，唔該你快啲起錨起錨，否則，你喺度好易爆血管！

我跟上述那位「人之患」的睇法啱啱相反；如果全港學生或年輕人都有呢班演藝同學咁有「吉士」和創意，亦有勇氣敢於無懼權貴，兼用和平及有顯著效果的表達手法，我一定長居此地，打死都唔走，因為咁先係個有希望的地方。

難得現今的年輕人有獨立思想，不受迂腐殘敗師長的虛偽影響，打破桎梏束縛，似番個人，咁都得唔到讚賞，反而嚇到校長要雞飛狗走？Bye Bye囉！

作為校長，乜唔係訓育新一代有識見，而望佢哋低能聽話聽教、信大話精、做家奴、任人老點不吭聲乎？又或者甘心活在謊言滔天、暴政橫行、法治不倡、粉皮當道、民不聊生嘅管治下？

若再由一批無力執政的高官亂嚟，瞞騙中央、打壓良民、禍港害人，咁就真係要「拿臨」移民嘞！但該校長卻反道而行，不鼓勵有生機的年輕人，卻以跳船逃難的威嚇去指摘他們，仲何來有資格當校長呢？死開啦！這處不需要你囉！

喂！你貴姓大名，移民去邊？講聲好喎！因為我唔想見到你！你太無知，我會避你！

(轉貼) 遊行人數？有Comment囉！ 作者﹕彭志銘

尋日，全港報章，各用十多頁版面去報道今年七一新聞，此乃近年鮮見的一遭。

何解，眾傳媒朋友今年特別着力關注七一活動呢？哦！主要係今屆的香港廢柴政府運作了一年，廣大市民用腳上街給他們打分，有讚有彈，有撐有反。據正反雙方的主辦單位報數，鄭耀棠聲稱，連番慶回歸活動的參與人數，為二十二萬五千；而冒着風吹雨打，行足四粒鐘，擠在街頭媽叉庸廢政府倒行逆施的人群，民陣話有四十三萬人，而訴求十分多，不滿的，就更多。

事後，坊間互相質疑正反兩邊人數的真確性。在一個再不講誠信的社會，騙子也有機做高官的年代，仲單憑聽人家所講，你就信？白唔白癡啲呀？為何不信自己的眼睛呢？

當七一上街遊行隊伍的龍頭抵達中環遮打花園，龍尾仍在銅鑼灣維園未行出球場，咁仲使講嘢？土共為減低遊行人數的參與，早已不擇手段，呃商舖優惠，又搞「水蛋Show」，甚至警方配合封路，唔畀市民沿途加入；而天文台亦十分識做，高調揚聲颱風殺到；亦有「恐怖分子」恐嚇個別議員，叫佢哋唔准上街，但新聞圖片所見，成條軒尼詩道六條行車線塞滿晒向政府說不的人。

人數的爭議，怎及市民怒火的重要。今年遊行人訴求之多，是三屆政府之最，亦反映咗最廢最無能最唔做得嘢嘅官員，以本屆政府最多囉！

其次，今年出嚟遊行的參與者，更多了一批往時少見的基層和老人家，可見呢個垃圾政府已爛到叫人忍無可忍了！真係No Comment囉！

彭志銘