觀影感想 11 - 15

係我錯

(觀影感想 十一)

係﹐係我錯﹐我真係唔應該睇過谷德昭先生執導嘅《家有囍事2009》之後﹐仲要睇《神奇俠侶》。

十分鐘﹐再忍十分鐘﹐再再忍十分鐘﹐結果都係忍唔住﹐熄機唔睇。我係租碟嘅﹐損失八大元。

錯就要認﹐打就企定。睇谷生套嘢(唔想稱之為“戲”)﹐俾我個種難受嘅感覺﹐我相信我已經得到應得嘅懲罰。

我知錯啦﹐以後都唔敢......嗚嗚嗚......

復仇者聯盟

(觀影感想 十二)

- 由於我真係唔覺得3D會令一套戲好睇咗(只會令張飛貴咗)﹐而且要戴住副3D眼鏡兩個幾鐘﹐其間還要保持一個最佳角度觀賞﹐都幾唔好受﹐所以我堅持搵間播2D嘅戲院幫襯。

- 荷里活就係荷里活。有資金﹑有技術﹑有人材(台前及幕後)拍得出呢類娛樂大片﹐呢刻為止﹐都只係得荷里活做得到。

- 有部份情節諷刺當今美國政府﹐不過始終只係popcorn movie﹐無謂諗得太多﹐無謂太多對號入座。

- 太多角色嘅戲好易出事﹐好多時會顧此失彼。呢個導演算處理得幾好﹐每個角色都有發揮。

- 有啲對白寫得幾幽默﹐知道來龍去脈嘅觀眾會識得笑。

- 其實啲外星大軍可以用箭同槍對付﹐個危機都唔係咁大啫。

- 片尾出現一個更勁嘅反派﹐聞說叫做Thanos﹐鋪哂路俾續集喇﹐各粉絲係咪好開心呢﹖

- DC Comics同Marvel夾埋﹐啲英雄人物無一千都有幾百﹐每個拍齣戲﹐續集再續集﹐副線又可以再獨立發展﹐漫畫改編電影呢條水應該可以食到世界末日。

最近重看了《BRAVEHEART》

(觀影感想 十三)

《BRAVEHEART》﹐1995年的電影﹐贏了很多個奧斯卡金像獎﹐包括最佳電影。

當然﹐在真正懂電影的人眼中﹐奧斯卡是越來越無足輕重。

電影有如下情節﹕英國國王頒下法令﹐英格蘭的貴族男人有權奪去蘇格蘭的新婚女子的初夜(很不可思議吧﹖)。英國國王的算盤是這樣的﹐與其要長期提防蘇格蘭人的反抗﹐倒不如逐漸清洗蘇格蘭人的血統。

好了﹐我的問題是﹐如果你是當時的蘇格蘭人﹐面對英格蘭這個強權﹐面對這條惡法﹐你會怎樣做﹖

A) 我無諗住結婚喎﹐關我Q事。

B) 我會結婚﹐不過我唔係女人﹐唔使陪條英格蘭佬瞓﹐話之佢啦。

C) 我只係一個女人﹐我條佬都唔做嘢﹐我更加

好笑係因為......

(觀影感想 十四)

呢套《THE SPY NEXT DOOR》我諗唔係咁多香港觀眾睇過。

曾經成龍嘅電影係香港觀眾嘅期待﹔今時今日﹐成龍嘅電影喺香港周不時仆直﹐真係 — 套一句俾人講到爛的話 — 情何以堪﹖

此片屬於可睇可唔睇之作﹐即係唔睇無乜損失果隻。

我睇咗﹐覺得幾好笑。

好笑﹐唔係因為套戲啲笑料﹐而係因為啲笑料成龍用咗十幾廿年都仲繼續用﹐翻炒又翻炒﹐而佢又真係好似好落力咁演......

總之﹐我睇嘅時候真係好幾次笑到哈哈聲。

成龍﹐你係得嘅﹗

條大橋幾有趣

(觀影感想 十五)

一班靠製造意外搵食的人遇上意外﹐自然會疑神疑鬼。

以上就係《意外》呢套戲條大橋﹐我覺得幾有趣。

題外話﹐如果係老千﹐應該都會成日疑神疑鬼﹐覺得周圍都係騙局﹐人人都信唔過。

唔﹐呢條都可以係一套電影嘅大橋呢......