觀影感想 1 - 5

Detail

(觀影感想 一)

寫財經﹐傷神費時﹐不如講吓電影。

曾經我以為自己好識電影﹐直至我認識了一位電影學者。Lesson: 一定要見識過真正嘅高手﹐先知自己原來未夠班。

我唔敢寫影評呀﹐真係未夠班﹐只係寫啲感想咋﹗

荷里活電影﹐特技固然係頂級﹐但其實最最最強係電影裡面嘅detail(細節)。好似呢套《STATE OF PLAY》﹐戲裡面﹐記者似一個記者﹐編輯似一個編輯﹐軍人似一個軍人﹐國會議員似一個國會議員。唔好以為簡單﹐背後要做好多工夫。

反面教材﹐你可以睇吓任何一套TVB劇習﹐律師﹑醫生﹑警察﹐做乜職業都好啦﹐同一個模樣。

留意《STATE OF PLAY》片尾﹐應該係向傳統媒體(報紙)致敬。

底線

(觀影感想 二)


無期望﹐自然無失望﹐有時反而會大喜過望。

看《EDGE OF DARKNESS》﹐我有少少驚喜。

Mel Gibson都算係A-Grade演員﹐不過近年事業好像有點停滯不前。其略帶神經質的演出﹐我是蠻喜歡的。但他擔正的某些電影﹐例如《THE PATRIOT》﹐例如《WE WERE SOLDIERS》﹐九成九係美國政府啲propaganda(政治宣傳)﹐我就有點吃不消了。

《EDGE OF DARKNESS》講的其實是一個老豆為個女報被殺之仇嘅故事。Mel Gibson飾演老差骨﹐單人匹馬﹐對付一間暗地裡做軍火生意的大企業。老差骨有智有勇﹐把大企業逼埋牆角﹐最後同大反派攬住一齊死。大仇得報﹐大快人心﹗

“搞我無所謂﹐搞我個女﹐或者條女﹐我同你搏命﹗”

 底線一過﹐唯有還拖﹗咁先似個男人㗎嘛﹗

火爆

 (觀影感想 三)

《順流逆流》上映時我沒有看﹐是後來一位影評人帶我到西灣河的電影資料館看的﹐那時資料館正舉辦除克電影回顧展。

很喜歡﹑很喜歡這套電影﹐每一個畫面都那麼有爆炸力﹗

有些創作人﹐隨著年歲漸長﹐創作力消退﹐團火就熄就熄咁。呢個肯定重未發生喺除克身上﹗睇呢套戲﹐我感受到導演嘅火爆﹗(據跟除克合作過嘅電影工作者說﹐佢的確係幾火爆。)
電影裡﹐我最喜歡的是一場困獸鬥﹐發生在香港的舊樓。導演把舊樓拍得活像一個森林﹐各路人馬就在內裡鬥智鬥力。留意導演如何處理此場的靜與動﹑鬆與緊﹑場景嘅替換﹑人物嘅關係。

伍佰飾演一位僱佣兵﹐高手中嘅高手﹔滄桑﹐同時man到爆﹗

 鬥心爆棚

(觀影感想 四)

朋友看完杜琪峰的<柔道龍虎榜>﹐說不明白﹐“唔知搞乜”。

杜琪峰接受訪問時說﹐他很喜歡<柔道龍虎榜>﹐但觀眾反應只是一般。

我自己是非常喜歡此片的﹗

古天樂飾演天才柔道高手司徒寶﹐雙眼有疾﹐逐漸失明﹐最終會完全睇唔到嘢 。於是他不再練功﹐終日混混噩噩﹐在酒吧當一份小差。後來被身邊的人激發﹐重拾鬥志。最後一幕﹐司徒寶完全失去視力﹐另一柔道高手(梁家輝飾)蒙上雙眼﹐ 兩人痛痛快快的打一場。電影沒有交代誰勝誰負﹐但這又怎會是重點呢﹖

其他角色有﹕Tony(郭富城飾)﹐一個武痴﹐到處找人挑戰﹔小夢(應采兒飾)﹐一心想成為歌手(留意﹕電影呈現出來的是﹐小夢完全沒有天份﹐但她 就是要向夢想直奔﹐說不定有天真會成功哩。)﹔老柔道師父(盧海鵬飾)﹐守著一間道場(留意﹕電影中可見﹐道場顯得有點過時﹐而且再沒有學生。師父和他那 個有點弱智的兒子在街上派傳單﹐途人反應冷淡﹐但他倆就是堅持著。)

我覺得此片的message是﹕就算明天係注定暗淡(就如司徒寶雙眼﹐逐漸失明)﹐死梗㗎喇﹐我們是不是就要選擇什麼都不做﹖還是﹐應該積極面對﹐拼命做﹐做得幾多得幾多呢﹖

電影是不是在暗喻香港﹖

“勇不可擋 鬥心爆棚”﹐海報標語如是說。

 一片天

(觀影感想 五)

史泰龍﹐曾經紅到發紫﹐後來霉過梅菜﹐近年事業有點起色。

《ROCKY BALBOA》中﹐Rocky這一代拳王﹐英雄遲暮。他經營餐館﹐但始終心在擂台。有一幕﹐Rocky想再次比賽﹐去見什麼拳擊委員會。委員會不批 准﹐Rocky初時克制情緒﹐後來終於忍不住說出一番話(請留意對白﹐很精彩的﹗)。經歷過事業低潮的史泰龍﹐好像是要把積壓多年的情感在這一幕盡情爆發 ﹗呢個moment﹐現實和電影交疊﹐史泰龍和Rocky是再也分不清誰是誰啦。

Rocky金句﹕“It's not about how hard you hit. It's about how hard you can get hit. And keep moving forward.”

跌倒﹐起身﹐keep moving forward﹐可能就是另一片天﹗

(以上係舊文轉貼)