又說一代宗師 之 點點點滴滴滴

(觀影感想 二十)

— 已經太多人講呢套戲﹐如你覺得厭倦﹐可立即離開此頁面

— 咁多人講﹐完全在王家衛意料之內﹐掌控之中﹔王家衛從來就精於計算

— 真係唔覺梁朝衛演得好﹐我甚至覺得佢好多時都唔係好知點演(如果稍為知道王家衛的拍戲方法﹐呢個其實唔會太意外)

— 以現在公映的版本來說﹐完全無必要用宋慧喬(除咗好成功地為電影又製造了一些話題......)

— 如果唔係有《葉問》在先﹐我幾肯定王家衛的《一代宗師》還在籌備階段﹐而且好可能係永遠停留在籌備階段果隻

— 之前有傳聞話會有個四小時終極版﹐後來王家衛否認。唉﹐是但啦﹐誰猜得透王大導心思呢﹖沒有四小時﹐也可以有三個半小時。沒有「終極」﹐也可以有「過渡」。之前誰又估到《東邪西毒》會推出終極版呢﹖

— 的確現在又沒必要推出四小時終極版﹐反正現版本越模糊就越多空間以供解讀﹐越多人解讀就越引到更多人睇(甚至睇多幾次﹐還不正中王大導下懷﹖)

— 雖然有大把人講呢套戲﹐但係我最有興趣知道佢點諗嘅就只有三個人﹕舒琪﹑邁克﹑四維出世(不過三位都好似未出手)

— 暫時係得咁多感想

— 即係唔排除日後會有其他感想﹐是的﹐王家衛這人和他的電影係特別令人有特別多的感想

原文發表於2013年1月28日

一代宗師 之 兒女情長

(觀影感想 十九)

— 其實係愛情片(其實王家衛有邊套唔係﹖)

— 整齣電影有點支離破碎(again﹐其實王家衛有邊套唔係﹖不過有時支離破碎得好﹐有時支離破碎得唔好。今次我覺得係唔好。)

— 王家衛的技法值得欣賞﹐不過喺佢啲舊作已經欣賞過好多次......

— 現在上映的版本有點像半完成品﹐難怪有傳聞遲啲會有個終極版

— 唔係好覺梁朝偉嘅演出同喺其他王家衛嘅電影有太大分別(應該係導演的問題﹐非演員之罪)﹐所以當《一代宗師》裡面嘅葉問穿起西裝拍照﹐觀眾都想起周慕雲(同場有觀眾笑出來)

— 肯定有參考過葉偉信嘅《葉問》同《葉問2》

— 暫時係得咁多感想

原文發表於2013年1月11日

01/01 元旦直擊訪問愛X力

「睇吓我哋幾多人撐CY﹐反CY就一個人都無﹐哈哈﹐哈哈哈﹐呢啲咪民心所向囉。喂﹐細路﹐知唔知完場喺邊度攞果二百蚊﹖」(愛X力成員 陳生)

「打個記者咋嘛﹐有乜咁大不了﹖ 再嘈﹐打埋你添呀﹗邊個反政府﹐我就打邊個﹗」(愛X力成員 李大姐)

「我唔該你哋啲人唔好成日咩都反啦﹐阻住政府做嘢﹐有咩好處呢﹖阿叔我食鹽多過你班友食米啦﹐想當年呀......(阿伯由皇帝大戰蚩尤說起﹐悶到人嘔泡﹐經考慮後刪除。)」(愛X力成員 黃伯)

「媽咪迫我出嚟﹐唔知呀﹐唔知做乜呀﹐我想返屋企打機呀。」(愛X力成員 何師奶個仔 六歲)

「衰仔亂講嘢﹐我哋成家都係自願出嚟撐CY撐政府嘅﹐絕對無威逼利誘。」(愛X力成員 何師奶)

「媽咪話出嚟行吓﹐有錢分﹐好著數﹐我阿公阿婆都嚟咗。」(愛X力成員 何師奶個女 九歲)

「喂喂喂喂喂﹐你問乜鬼嘢呀﹐走開啦﹐你邊度㗎﹖﹗」(愛X力成員 何師奶老公)

(有部份愛X力成員開始鼓譟﹐訪問被迫到此為止。)

原文發表於2013年1月1日

31/12 除夕直擊訪問

「吓﹖除夕喇﹖明天咪元旦﹖阿爺﹐救命﹗」(梁XX)

「各位為出年嘅投資做好準備未﹖未﹖不妨參加本人舉辦的投資講座﹐每位收費$8,888﹐本人將會知無不言﹐言無不盡﹐技法心法傾囊相授。乜話﹖嫌貴﹖唔付出想有收穫﹐發你個夢﹐快啲磅水......(下刪幾千字)」(某財經演員)

「倒數唔使預我﹐早啲瞓好過﹐無你咁好氣。」(牛頭角順嫂)

「如果﹐時間﹐在除夕﹐這一天停頓﹐你說多好......那......那......我就不必擔心出年業主又加租﹐你知啦﹐寫詩好難搵錢......」(黃大仙大詩人﹐又名天空的小雲雀)

「今晚我又係孤單一人﹐孤單一個﹐感覺不到夜美好。覆中環成人商店負責人﹐成人用品我好多﹐暫毋須入貨﹐謝通知。」(銅鑼灣處男XXX 45歲)

「銅鑼灣處男哥﹐除夕想搵個伴﹐可有空出來喝一杯﹖有意請電﹕XXXX-XXXX」(失婚婦Susanna 63歲)

原文發表於2012年12月31日

聖誕﹖倒數﹖

(59.9秒無無謂謂雜誌 四十六)

唔知幾時開始﹐我亦唔明點解﹐聖誕都要倒數﹖

不過﹐我熱切期待﹐有一天﹐香港會發展到清明都要倒數呢個地步。

個場面一定很有趣的。

一定。

原文發表於2012年12月28日

聖誕節唔食西餐

(59.9秒無無謂謂雜誌 四十五)

聖誕節食西餐﹖

咪搞。

人又多﹐位又難搵﹐個個都叫聖誕餐﹐餐廳於是就大量整定晒﹐應該熱嘅唔夠熱﹐應該凍嘅唔夠凍﹐價錢通常貴咗﹐質素通常下跌。

所以﹐聖誕節我去食中餐。

同樣邏輯﹐農曆新年(係「新年」﹐唔係「春節」)﹐可以的話﹐我都唔會選中餐。

此之謂Contrarian也﹐哈哈。

26/12 Boxing Day直擊訪問

「唔知阿爺會唔會送禮物俾我呢﹖我好緊張啊。」(梁XX)

「繼續放假﹐yeah﹗」(打工仔Alan)

「Boxing Day贈各位fans幾句﹐買股記得要設止蝕位﹐衍生工具只宜小注﹐出年個股市都係上上落落啦﹐記得記得量力而為呀.....(下刪幾千字)」(某財經演員)

「個衰佬幾十年都無送過禮物俾我﹗」(牛頭角順嫂)

「我想要一份禮物﹐可以令我靈感澎湃。我想要一份禮物﹐可以令我寫出彩虹﹐寫出北極光﹗我想要一份禮物﹐可以令我的詩閃閃發亮﹐給這個灰暗的世界一點點光。即使只是那模不著的一剎那﹐我願意誠摯地相信我擁抱過永恆。」(黃大仙大詩人﹐又名天空的小雲雀)

「唔該啲豬朋狗友唔好再送吹氣公仔俾我。就算送﹐都唔該唔好送叮噹呀﹑Q太郎呀﹑忍者小靈精呀。另外﹐旺角小蜜桃﹐我想要的是真愛﹐我的第一次也只會留給真愛﹐金錢交易免喇。」(銅鑼灣處男XXX 45歲)

「銅鑼灣處男﹐本店備有大量貨品﹐Boxing Day大減價﹐請親臨選購。地址﹕XXXXXXXXXXX」(中環某成人商店負責人)

 

原文發表於2012年12月26日

25/12 聖誕直擊訪問

「元旦請你不要來﹐就讓聖誕今晚永遠存在......不准遊行教我下台﹐特首寶座不要變改。」(梁XX﹐好像開始有點精神異常)

「放假﹐yeah﹗」(打工仔Alan)

「嗱﹐我都叫咗各位留意銀行股啦﹐噚日啲內銀股升得幾靚﹐信我嘅朋友應該收咗聖誕禮物啦﹐我真係料事如神.....(下刪幾千字)」(某財經演員)

「聖誕咪聖誕囉﹐都話無特別咯﹐問問問﹐阻鬼住我打牌﹐碰﹗」(牛頭角順嫂)

「聖誕﹐色彩繽紛﹐歌聲悅耳﹐人們歡樂﹐只有我﹐在熱鬧的﹐人來人往的﹐街道﹐感到無比的空虛﹐入骨的孤寂﹐孤寂啊﹐只有在寫詩的時候﹐我才能勉力的把你強壯的身軀稍稍推開......」(黃大仙大詩人﹐又名天空的小雲雀)

「噚晚平安夜﹐我又再失望一次。」(銅鑼灣處男XXX 45歲)

「銅鑼灣處男﹐聖誕想約會嗎﹖這是我的電話號碼﹕XXXX-XXXX﹐價錢面議。」(旺角小蜜桃)

原文發表於2012年12月25日

24/12 平安夜直擊訪問

「平安夜到了﹐元旦還會遠嗎﹖我而家覺得好X煩﹗」(梁XX)

「返半日工﹐yeah﹗」(打工仔Alan)

「聖誕鐘﹐買匯豐﹐早前錯過咗嘅朋友﹐不妨留意其他銀行股。至於大市﹐估計都係唔跌就升﹐唔升就跌.....(下刪幾千字)」(某財經演員)

「咪又係咁過﹐有咩咁特別﹖」(牛頭角順嫂)

「什麼是平安夜﹖平安夜就像候鳥﹐到時到候總會來的。來了﹐又走﹐留下是我的惆悵。是的﹐我很容易惆悵﹐我感性﹗」(黃大仙大詩人﹐又名天空的小雲雀)

「平安夜﹐失身夜﹐呢句說話令我失望了幾十次﹗」(銅鑼灣處男XXX 45歲)

原文發表於2012年12月24日

22/12 末日(放了飛機)直擊訪問

「大鑊﹐好快就元旦﹐好快就元旦大遊行﹐怎麼辦﹖怎麼辦﹖你說怎麼辦﹖」(梁XX)

「各位教友﹐外星人啱啱通知我﹐末日會順延十年﹐在此期間﹐請繼續捐獻。」(某鼓吹末日論教派教主)

「好在無蝕到一日假﹐yeah﹗」(打工仔Alan)

「買啲黃金啦﹐簡單啲買黃金ETF啦﹐留意資源類股份.....(下刪幾千字)」(某財經演員)

「好嘢﹐可以繼續睇TVB。」(牛頭角順嫂)

「還唔起條數﹐我已經準備好著草﹗」(屯們賭仔明)

「再唔X還錢﹐你班XX就真係末日喇﹗」(大耳窿Robert哥)

「末日啊﹐你為什麼不守諾言呢﹖而那天色啊﹐為什麼比漆黑更漆黑﹖我死不了啊﹐是不是就成名無望呢﹖唉﹐我又要為交租苦惱了。」(黃大仙大詩人﹐又名天空的小雲雀)

「人生是有希望的。」(銅鑼灣處男XXX 45歲)

 原文發表於2012年12月22日

21/12 末日直擊訪問

「呵呵﹐無元旦﹐睇你班友元旦點遊行。」(梁XX)

「真係有末日咩﹖死喇﹐咁我呃埋咁多錢有乜用﹖」(某鼓吹末日論教派教主)

「今日係末日﹖哎呀﹐早知今日唔攞假啦﹐蝕咗添。」(打工仔Alan)

「買啲黃金啦﹐簡單啲買黃金ETF啦﹐留意資源類股份.....(下刪幾千字)」(某財經演員)

「慘﹐睇唔到TVB啲劇啲大結局。」(牛頭角順嫂)

「哈﹐係就好﹐條數唔使還﹗」(屯們賭仔明)

「你班XX咪X以為末日就唔X使還錢﹐淋你油㗎﹗」(大耳窿Robert哥)

「輕輕的我走了﹐正如我輕輕的來﹐我只有雲彩﹐可惜不能用雲彩交租﹐世界末日﹐我死了後﹐是不是可以出名呢﹖」(黃大仙大詩人﹐又名天空的小雲雀)

「嗚嗚......嗚嗚嗚......」(銅鑼灣處男XXX 45歲)

原文發表於2012年12月21日

TVB劇 之 十大不可思議

(59.9秒無無謂謂雜誌 三十七)

(一) 經常都會好人齊

— 阿媽阿爸兄弟姊妹姨媽姑姐成村人圍埋一齊食飯開家庭會議。唔止人齊﹐仲要開得好頻密。現實中你想約一個都難。

(二) 八婆總會在lift中

— 而且講是非講得好大聲﹐慌死同在lift中嘅當事人聽唔到。

(三) 間屋又大又實用

— 令人懷疑個故事背景唔係喺香港。

(四) 只知戀愛大過天

— 無論什麼劇種﹐基本上80%以上戲情係情情塌塌。

(五) 辦公室永不辦公

— 你幾時見過啲職員辦公﹖通常都係吹緊水。

(六) 失意一定去蒲吧

— 除咗蒲吧﹐失意的時候﹐呢個世界上係無其他活動嘅。

(七) 奸人會奸到出面

— 就爭在未鑿喺額頭。如果現實係咁易分就好咯。

(八) 古裝其實係時裝

— 衣著同佈景係古代﹐劇中人就完全係現代。

(九) 匠心獨運的配樂

— 我睇過一齣TVB武俠劇﹐配樂竟然係《Terminator 2》嘅soundtrack﹐怪雞得嚟非常之後現代﹐Quentin Tarantino都可以行埋一邊。如此這般的例子﹐實在大把﹐你不妨留意一下。

(十) 不可思議的神秘魅力

— TVB劇對師奶的確係有一種難以解釋的不可思議的神秘魅力。已列入社會學﹑傳理學﹑心理學及神秘學的研究範疇。

原文發表於2012年11月23日

一件關於穿衣的可大可小的事

(59.9秒無無謂謂雜誌 三十四)

有一晚﹐喺惠康﹐見到一個年青人著住一件紅色嘅印有一個好大嘅納粹黨徽嘅衫。(納粹黨徽﹗)

如果衣著真係making a statement﹐咁我就真係唔知果位年青人想make一個乜嘢statement。

橫看直看﹐佢都唔係Anglo-Saxon吖﹐斷估唔會支持納粹㗎﹖

想來想去﹐我只能認定佢係無知。

英諺有云﹕ignorance is bliss。

未必。

有些時候﹐ignorance可能會係death。

呢條無知仔如果著住果件衫去外國某些地區 — 唔係講笑 — 可能真係會俾人打X死的。

(小插曲﹕當晚惠康有個外國人見到年青人件衫﹐表情相當憤怒﹐真係有啲好似想打佢咁。至於個外國人會唔會係猶太裔﹐我就不得而知喇。另一方面﹐果位年青人全程不知不覺﹐完全感受唔到件衫引起別人不快。)

 原文發表於2012年11月15日

去香港誠品......飲珍珠奶茶

(59.9秒無無謂謂雜誌 三十一)

好奇怪﹐香港誠品完全唔能夠令我有意欲睇書。

(可能因為太嘈﹖可能因為店鋪設計﹖可能因為台版書太多﹖十萬個可能......)

我去﹐係為咗天仁杯珍珠奶茶。

呢間嘅味道可能係最接近台灣。

有茶味﹑有奶味﹑甜度適中﹑珍珠軟糯﹐十八大元﹐個人意見﹐好過Starbucks啦。

誠品﹐多謝你﹐帶來了高水準的珍珠奶茶。

原文發表於2012年11月12日

權貴想要的「效率」

(59.9秒無無謂謂雜誌 十七)

經常都有啲權貴話香港無效率呀﹐大陸有效率呀﹐香港再係咁就遲早玩完呀﹐blab blab blab﹐blab blab blab......

香港無效率﹖眼前又真係有一例噃﹐就係王維基申請免費電視牌照﹐超過一千日都無結果。

查實﹐權貴口中的所謂「效率」﹐說穿了﹐就係﹕

我想快就快﹐呢個係「效率」。

我想慢就慢﹐呢個都係「效率」。

我想件事永遠唔會發生﹐就永遠唔會發生﹐呢個當然亦都算係「效率」﹗

傻豬﹐明冇﹖

原文2012年10月21日

世界未末日﹐自己先末日

(59.9秒無無謂謂雜誌 十四)

年年都有人話係世界末日。

1999年又話係﹐2000年又話係﹐十二年過去喇﹐個世界咪仲喺度。

家陣又有人話2012年係世界末日喇﹐仲有埋日子添呀﹐12月21日呀﹐又瑪雅曆又什麼的。

到底係咪呢﹖我就唔知喇。

不過我就知一件事﹐有一年﹐外國有個鼓吹末日論的邪教組織﹐成班教友跟個教主上咗個山度﹐然後集體自殺。

世界未末日﹐自己先末日﹐真係醒到呢......

原文發表於2012年10月18日

穿黑衣是很危險的

(59.9秒無無謂謂雜誌 十)

有留意新聞嘅讀者﹐知我講緊邊件事啦。

家陣香港已經去到未有任何行動就可能會俾人拉嘅地步。

今次拉黑衣﹐下次可能拉黃衣﹐下下次可能拉紅底橫﹔誰知道呢﹖

其實啊﹐也不關衣服的事﹔拉這班小朋友﹐主要是因為他們比較會思考﹐而且膽敢表達出來。(這還不是造反﹖)

所以啊﹐香港人啊﹐唔想俾人拉﹐思想就要主旋律一點嘛﹐又或者索性諗少啲嘢嘛﹐理咁多做乜呢......

今日天氣幾好呀﹐哈哈﹐哈哈哈......

 原文發表於2012年10月11日