Lotso from 7-11 Hong Kong

大作

繼續尋找最正的可樂

好夠麥味

廣東字

啲嘅 咁 噃 啫 嘞 咩 囉 喎 吓 嗰 喇 啩 叻 乜 吖 嘢 咗 喺 晒 咯 嘥 睇 佢 哋 嗱 嚟 啱 咪 揸 攞 唉 吔 嚿 梗 瞓 睥 咦 掂 噚 諗 㗎 揼
哂 唞 冇 跣 唓  晒 嘜 孭

今日見到顏卓靈

金鐘太古廣場見到﹐好靚女﹐不過太厚妝。

職業炒家

香港﹐確實係一個俗富繁華之地﹔而最能夠體現出呢點嘅﹐應該就係我哋個金融市場。

市場裡面有一批職業炒家﹐佢哋之中有些人資產可能多過一個中小型基金﹐trade過億金額﹐上落以百萬計。

工作上我招呼過好一些職業炒家﹐龍哥(化名)係其中一位。

八月五日﹐恆指曾大跌1241點﹐收市跌938點﹐好刺激。

你有興趣了解一下一位職業炒家當日的操作和看法嗎﹖

「龍哥﹐可以講吓你今日做過乜﹖同埋對個市點睇嘛﹖」

「今日我咪一早返到股票行囉。炒嘢嘅都知﹐開市頭一個鐘左右﹐同臨收市前半個鐘左右﹐係最重要﹐好多時搵唔搵到食就係睇呢兩段時間。

「噚晚美股跌咗五百有多﹐今日港股都無運行啦。我揸咗球半中移動put輪過夜。期指一開就跌九百幾﹐中移動競價跌兩個幾﹐我條輪可以話贏硬。不過贏幾多就唔知喇﹐因為要等啲發行商開價。

「九點鐘開市﹐等咗十分鐘都未開價﹐我差啲想打電話俾個莊(發行商)。不過十分鐘唔算耐咯﹐我試過三十分鐘都未開價。後來開咗價﹐我第一時間隊一球先﹐贏$0.11。個市仲係插緊﹐剩低嗰五十萬股put咪坐多陣囉。

「係呀﹐呢球半put輪埋單計數贏咗十幾萬。買賣窩輪無印花稅﹐使費平啲。有時我都會炒正股嘅﹐如果見到有機會。好似今日上午有段時間﹐我見個指數跌定咗啲﹐咪短炒隻國壽囉﹐贏五萬蚊到啦。

「全日贏over廿萬﹖咁又無﹐我炒啲call輪同啲指數ETF輸番些少啦。

「個財經台猛話股災股災﹐股乜嘢災呀﹖你有無見過個市淨係得沽盤﹐無買盤吖﹖有人沽﹐無人接﹐你先話「災」啦。今日唔係喎﹐買賣都好活躍。其實跌過千點﹐對有錢喺手嘅人係入貨機會。我就$72.90入咗10,000股匯豐喇。隻5號仔﹐13陪PE左右﹐又有息派﹐點解唔買呀﹖如果升到近$80.00﹐我就沽咗佢食糊﹔再大插﹐我再買10,000股添。清楚知道自己承唔承受到個風險﹐控制注碼得宜﹐呢個係贏錢關鍵。

「我唔係亂搏嘅。你睇睇恆指成份股嘅平均PE﹐得11陪﹐算係偏低﹔買藍籌﹐贏面應該幾大。再講﹐我真金白銀找齊數﹐又唔係孖展﹐怕乜呢﹖

「驚唔驚美國國債問題﹖唔係唔驚﹐係無得驚。年頭開始﹐唔係歐債﹐就係歐元﹐國家都話可以破產嘅﹔而家到美國﹐一時又話降評級﹐一時又話無問題﹐一時又話解決方案唔通過﹐總之就危機處處﹐個市就「發」上「發」落。其實我哋呢類職業炒家就係靠波幅搵食﹐如果落場會驚﹐應該係時候轉行。 

「個市呆呆滯滯無波幅我就真係驚喇。今日收市﹐我期指開咗倉﹐揸兩張過夜。星期一開市最好就彈番幾百點啦。哈。」

「如果唔彈呢﹖」我問。

「唓﹐唔對路咪打咗佢囉(指平倉)﹐邊有實賺㗎。」龍哥望望我﹐表情好似話我問得好多餘。

(這篇稿背後有一個故事......可能有天我會詳細寫出來......)

中秋夜

月餅

迷失銅鑼灣

方卓如在《迷失中環》的序中說﹐「當年的《信報》，我最喜歡看艾黛的〈中區麗人〉，年少無知的我，讀到她行走中環、辦公室鬥法與賭仔明愛恨交纏的故事，恨不得立即走入江湖，大展拳腳。」

余生也晚﹐〈中區麗人〉我無睇過﹔不過﹐曾幾何時﹐我最喜歡讀的是〈國金外望〉。

讀的時候﹐我已不是年少無知﹐我已身在江湖。然而﹐江湖又豈會局限在中環﹖

黃生﹐專炒二三線股﹐一日turnover可以過億﹔開市時﹐佢基本上唔會離開佢間淺水灣獨立屋。李生﹐做現貨期貨套戥﹐狠起上嚟﹐揸過百張期指﹐上落以千萬計﹔佢亦係於家中炒作﹐住北角。文哥﹐主力炒輪﹐幾球幾球咁入貨﹐幾球幾球咁出貨﹔佢喺荃灣某證券行有間專房。所以話﹐金融故事又點會只發生在中環﹖

我做交易員﹐又稱「出市」。呢﹐即係嗰啲著住件紅背心嘅人。不過我唔使著紅背心﹐因為我唔係喺交易大堂返工。

講起交易大堂﹐股壇長毛曾經極力主張廢除﹐話無實際用途﹐租金又貴。Well﹐今時今日﹐廢除交易大堂﹐技術上係可行。但係﹐如果無咗﹐以後要搵邊個地方象徵香港股票市場呢﹖唔好覺得「象徵意義」好唔實際﹐好虛無縹緲﹐某啲無形(intangible)嘅嘢其實先最值錢﹐auditor就最清楚。我認為交易大堂可以搬﹐唔可以無。有個方便地點處理部份交易﹑又可以搞吓上市酒會諸如此類嘅活動﹑傳媒又多個固定地方工作﹐有乜唔好呢﹖股壇長毛故意簡化事情﹐實在唔係第一次。

我住天后﹐公司喺銅鑼灣﹐好近﹐行過咗維園就到。沿途買份《信報》﹐攞兩份免費報紙﹐一日嘅精神食糧就齊喇。

有外國旅遊書如此介紹銅鑼灣﹕「One of the most famous shopping districts in the world.」出入呢區咁多年﹐我從來無咁諗過﹐但係諗落又覺得好貼切。其實﹐除咗商店﹐近兩年唔少金融機構都嚟呢區落腳﹐多得中環啲寫字樓租金升到上天。銅鑼灣工商皆旺﹐希慎應該最開心。

改咗交易時段之後﹐上午八點半就要返到公司。

八點半至九點呢段時間﹐未開市﹐亦未有得競價﹐盤房(交易部)通常好得閒。今日都唔例外。

「現貨市場加時﹐就嚟期貨市場都要加時喇。」說話的是全哥﹐盤房老鬼。

「唔係嘛﹖」我答話。

「阿Joe﹐你無睇噚晚新聞咩﹖話要開到夜晚十一點幾呀。唉。」全哥搖搖頭。

「交易所話要同其他市場接軌呀﹐要反映外圍消息呀。」Gary指一指手上份報紙。

此時﹐期貨部交易員宗仔拍一拍檯﹐說﹕「接乜嘢軌呀﹖反映乜嘢外圍消息呀﹖不如開埋星期六﹑日啦。唔通星期六﹑日個世界停頓呀﹖無消息要反映呀﹖」

又係喎。唔通星期六﹑日個世界停頓呀﹖無消息要反映呀﹖直頭就應該公眾假期都開市啦﹗話時話﹐

個世界每分每秒都有事發生﹐一於開足廿四小時﹐全年無休﹐once and for all﹐以後都唔需要再為延長交易時段呢個問題而煩喇﹗哈﹗

(曾刊於信報)

一把尺

有日同鄰居陳師奶同“車立”﹐陳師奶知我做證券行﹐問我某股票抵唔抵買﹐我答唔知。

佢望住我﹐表情好似話﹕唔係呀嘛﹐咁都唔知﹖

其實﹐抵唔抵買呢個問題無必要問人﹐要問就問自己心中的一把尺。

有部份人喜歡以美國國債為尺。如果某投資項目回報高過美債﹐他們就認為抵買﹐反之就唔抵買。為何以美債回報為尺﹖你隨便打開一本投資入門書﹐都會話美國政局穩定啦﹑美國政府唔會違約啦(下刪無數個大大小小理由)﹐因此美債係屬於無風險投資。

「美債無風險」﹐我認為係一句笑話﹐又或者係美國政府及依附其搵食之金融機構嘅一句宣傳語。

大家都係香港人﹐十之八九投資於本地股市﹐無謂懶專業﹐懶有國際視野﹐捨近圖遠睇美債回報﹔要選一把尺﹐我認為本地物業租金回報會更適合。假設一個六百萬單位﹐每個月租金係三萬元﹐一年租金就係三十六萬元﹐回報率即是6%。有了這個回報率﹐就可以和目標股票作比較。

以上是一個簡化了現實的例子。係人都知物業分住宅﹑商舖﹑寫字樓﹐仲可以再分高中低檔﹐租金回報豈會一樣﹖要選那一個來當一把尺呢﹖跟現實世界很多問題一樣﹐這個問題無標準答案﹐但我嘅建議係選中檔住宅。

話 明無標準答案﹐你當然可以唔同意用中檔住宅﹐你甚至可以完全唔同意以物業租金回報來衡量股票。我無意逼你接受我把尺﹐實在這也未必是最好的一把。我想強調 的是﹐投資者心中一定要有一把尺﹐否則的話﹐處身市場﹐會手足無措﹐會不懂何謂貴﹑何謂平﹑幾時買﹑幾時沽﹔像一隻盲頭烏蠅﹐亂衝亂撞。工作上﹐我確係遇 過唔少盲頭烏蠅﹐他們老覺得買賣股票是無法可依的﹐同時又樂此不疲地買買賣賣(好費解啊!)。

還有﹐市場是動態的﹔再以樓市為例﹐樓價和租金不會恆常不變﹐回報率也就不會恆常不變﹐於是那把尺就得靈活調教。很有些人不懂變通﹑忽視市場變化﹑機械式操作﹑硬性跟隨某一百分比來止蝕止賺﹑又或者死跟一些什麼目標價﹐這無疑於搵自己笨。

看到這裡﹐可能有讀者起疑﹕怎麼這個姓葉的把投資說得好像很簡單﹖

是的﹐投資這回事﹐可以很簡單﹐亦可以很複雜。金融世界很大﹐而且還有場內和場外之分﹐要弄明白每一環節是不可能的。但﹐好消息是﹐跟一般投資者最貼身的股票現貨市場其實相當簡單。如果你硬係唔明﹐硬係覺得無從入手﹐啱喇﹐我呢個欄就係為你而寫。

(曾刊於信報)

市場迷思

蔡東豪有迷思*﹐我都有迷思。

以下迷思﹐我無答案﹔如果有答案﹐迷思就不成其迷思啦。

–所謂「高頻交易」﹑「快閃交易」﹐其實係咪用高科技打尖﹐從而獲利﹖

–如果係﹐對無高科技嘅小投資者肯定唔公平﹐監管機構及交易所係咪應該好好規管﹐而唔係幫手開路﹖

–監管機構及交易所應該致力維持一個公開﹑公正﹑公平嘅市場......係我太傻太天真﹖

–投資銀行有自己嘅黑池﹐又有自己嘅交易員坐盤﹐又有主要經紀業務﹐似唔似做莊重可以睇晒其他人嘅牌﹖果如是﹐難怪能夠賺到天文數字嘅錢﹗

–其實係咪只要有人肯落搭﹐任何金融產品都有金融機構砌到出嚟﹐即使該產品同實體經濟一點關係都沒有﹖即使該產品之風險其實無人清楚﹖

–當越來越多金融活動脫離實體經濟需要﹐社會仲應唔應該大力發展金融業﹖

–凡阻礙大型金融機構搵錢的﹐就等同阻礙金融市場發展﹖就等同阻礙社會發展﹖

–美國股市發生「閃電崩盤」﹐事後出咗調查報告﹐但係有幾多人睇過﹖睇過而且明白嘅人又有幾多﹖最重要係﹐邊個知份報告有幾可信﹖

–評級機構隨便給AAA﹑股市可以閃電崩盤﹑銀行亂咁貸款﹐諸如此類荒謬事情竟然都發生在成熟市場﹔成熟市場都係得啖笑﹖

–金融海嘯還不足以說明歐美金融市場千瘡百孔﹖怎麼有人凡事都認為要師法歐美﹖

–馬多夫一案是不是帶出了一個事實 – 無論某個人幾咁猛料﹐其實都唔會有投資必勝方程式﹖

–一次又一次嘅金融醜聞﹐是不是說明﹐如果故事太完美﹐我們幾乎可以肯定背後有啲蠱惑﹖

–「私募基金」同「上市公司」﹐我認為係兩個互相矛盾嘅概念﹐但係竟然可以同時走在一起。金融市場認真神奇。

–既然有fund of funds﹐當然可以有fund of funds of funds﹐當然可以有fund of funds of funds of funds﹐如此類推﹐咁點解無呢﹖唔通個騙局太明顯﹖

–我都相信市場經濟﹐我都相信無形之手﹐但係我諗唔明﹐金融才俊對社會嘅貢獻真係大得過醫生﹖份收入真係差好遠喎……隻無形之手去咗邊度﹖

–當一隻新股上市﹐即日可以爆升幾倍﹐然後一直插水﹐我還應不應該相信股市的其中一個功

能係發現價格﹖

–有支持延長股市交易時段嘅人話﹐此舉能增強股市發現價格之功能﹔先假設這理由成立﹐我想問他們的是﹐對必定做成市場分割嘅另類交易平台又有何看法呢﹖

–點解有投資課程聲稱有必勝方程式﹖點解學費只係幾千至幾萬蚊﹖

–點解財經演員可以喺九秒九內解答任何問題﹖其中有啲問題﹐你就算俾九日九夜我﹐我都唔識答。

–其實我諗咁多做乜呢﹖你睇﹐陳師奶炒股炒輪炒得幾開心﹗

*見《壹週刊》第1091期《兔年投資哲學迷思》 

(曾刊於信報)

對談(2)

(尚未有一﹐何來有二﹖你無眼花﹐因為《對談》一文已於早前發表在我的信博﹐有興趣可到此網址﹕www.hkej.com/template/blog/php/blog_index.php?blog_blogs_id=58。另外﹐請注意本文寫於更改交易時段前。)

散戶﹕你哋就好啦﹐開市四個鐘﹐食飯兩個鐘。

交易員﹕好心你就咪執人口水尾啦﹐重要執句有誤導成份嘅。

散戶﹕有乜誤導呀﹖

交 易員﹕每個交易日嘅上午九點半至九點五十分係競價時段﹐呢二十分鐘投資者一樣可以做嘢﹐咁點解唔計入交易時間呀﹖計嘅話﹐交易時間就起碼有四個鐘頭二十分 鐘。至於中午休市﹐係就係兩個鐘﹐但你知唔知道下午開市前半個鐘就可以開始輸入或者取消買賣盤﹐我哋做交易員嘅兩點正就要standby﹐咁點食兩個鐘飯 呀﹖重有呀﹐我哋好多時休市都有嘢做㗎。

散戶﹕服咗你咯﹐咁都要拗多二十分鐘。就算係咁﹐香港個市都係開得短啦。

交易員﹕唉﹐又返嚟呢個point。長就係好咩﹖有無頭腦簡單啲呀﹖依據呢個邏輯﹐不如星期六﹑日都開市﹐紅日都開埋﹐咁我哋香港一定number one啦。

散戶﹕喂﹐頭先你話下午開市前半個鐘就可以開始輸入或者取消買賣盤﹖

交易員﹕係。雖然一般人唔察覺﹐但其實下午開市前呢半個鐘﹐個市對消息已經有反應﹐啲買賣盤已經變動緊。某程度上﹐呢半個鐘都屬於交易時間。

散戶﹕咁樣講法﹐兩個鐘break﹐實際上只係得一個半鐘﹖

交 易員﹕全對。三月七日開始﹐中午休市會縮短到一個半鐘﹐所以實際上只係得一個鐘。出年會再縮短到一個鐘﹐即係實際上只得半個鐘。交易所想完全取消中午休市 ﹐明眼人都睇得出。其實如果取消真係有利股市發展﹐我建議立即就取消﹔而如果根本就無作用﹐我認為一分鐘都無必要縮短。

散戶﹕我話你哋啲經紀行反對延長交易時段﹐又反對取消中午休市﹐係因為懶﹑要食飯﹑要午睡就真。阻住香港股市發展﹐阻住地球轉﹐哈哈。

交易員﹕你又執人口水尾喇。呢類言論我都聽過﹐講嘅不離兩個原因﹕一﹐對市場運作唔夠熟悉﹔二﹐有心抹黑。前者可以原諒﹐後者卑鄙到極。大家反而要諗諗點解有人咁積極鼓吹延長交易時段﹖

散戶﹕咁你又點解咁積極反對呀﹖

交易員﹕市場當然應該發展﹐但要兼顧小投資者嘅利益。我聽過唔少支持延長嘅理由﹐根本就似是而非。恕我唔一一說明喇﹐因為會講到天光。只有一點一定要提一提﹐我睇唔到延長交易時段同增強股市競爭力有乜關係﹐不過就相當肯定會對大型金融機構有利。

(此時﹐交易員唔知喺邊度攞咗本書出嚟。)

交易員﹕你睇睇林森池本書《證券分析實踐》點講﹐「大銀行或金融機構時刻都在垂涎你手上的小雞蛋」﹐改變遊戲規則其實會唔會係獵取小投資者手上啲小雞蛋嘅伎倆呢﹖

散戶﹕就算係﹐你都改變唔到啦﹐都塵埃落定咯。計我話﹐不如諗吓點樣獵取其他人啲小雞蛋好過啦。941幫我隊一萬股﹗

 (曾刊於信報)

京川滬與金股匯

有食家話最怕見到打著「京川滬」這招牌的食肆。點解﹖因為京﹑川﹑滬﹐隨便一瓣都博大精深﹔要學識一瓣都唔容易﹐更唔好講話精通全部。好多時幫襯呢類食肆﹐樣樣都有﹐就係無樣對辦。知味食家﹐自然知所選擇。 

金融市場又有何不同﹖某些專家一副通天曉的樣子﹐「金股匯」無所不談﹐但其實只係略懂皮毛﹐甚至可能連皮毛也談不上。當中最令人發笑嘅係有專家無論分析嘅對象係乜﹐用嘅都係同一個方法﹐完全忽視每件事物嘅獨特性。呢類「通天曉專家」呃到一般人﹐呃唔到真正嘅行家。

金 融市場點止金﹑股﹑匯﹖隨便數吓﹐仲有債券﹐仲有商品﹐仲有更難搞的數之不盡的衍生工具。無落過場﹐好難真正明白﹔就算落過場﹐一個人時間有限﹐試問又能 夠精通幾多瓣呢﹖還有一點﹐市場永遠走得快過本textbook﹐如果你的著眼點是如何操作賺錢(我以為這是大部份投資者的著眼點﹐小部份聲稱唔係為錢嘅 ﹐咁為乜呢？)﹐那實在沒必要被那些嚴重缺乏實戰經驗﹑估錯又唔使賠錢的蛋頭學者嚇倒。 

說到操作﹐身為參與者之一的你﹐ 當然有需要了解一下市場內其他各大大小小的參與者。舉例﹐指數基金﹑對沖基金﹑互惠基金﹑私募基金﹑創投基金﹐統統都叫做基金﹐但行事就很不一樣。投資銀 行﹑零售銀行﹑證券行﹐大家都係金融機構﹐但你又真係知道佢哋嘅分別﹖大戶﹑莊家﹑炒手﹐聽就聽得多﹐你認識又有幾深﹖你以為呢啲係基本功ABC﹐人人都 識﹖哈﹐唔係講笑﹐我遇過疑似資深投資者連經紀和出市代表都分不清。信我吧﹐花點時間弄明白不同參與者在市場內的角色﹐對分析市況肯定有幫助﹔更重要的是 ﹐你會發現有很多大眾見解和陰謀論原來都是站不住腳的。這些暫且按下不表﹐留待以後逐一拆解。

講咗咁耐﹐我其實係想介紹 一下自己個專欄﹐免得你日後去錯舖頭點錯菜。京川滬樣樣有無樣精﹐己所不欲﹔所以﹐金股匯大包圍乜都講一餐﹐我識﹐但我唔會咁做。本欄內容主要圍繞股市﹐ 希望能幫你看得更清楚﹐當做決定時便能更得心應手。我現在任職於證券行交易部﹐亦希望跟你分享一些工作上的所見所聞。

感謝《信報》給予機會。這份報紙喺投資路上啟蒙了我﹔而且﹐我係大約五年前在投資版看到證券行的招聘廣告﹐於是搵到份工﹐踏入金融業。能夠在此發表文章﹐對我真是別具意義。 

(曾刊於信報)

型嗎﹖

雲上舞 風裡刀

步驚雲