觀影感想 16 - 20

真係奇

(觀影感想 十六)

《PIRATES OF THE CARIBBEAN》前後拍咗四齣。

真係奇﹐我竟然一齣都唔明啲劇情。

係真係唔明﹐完全唔知發生緊乜事﹐只係見到一幕幕熱熱鬧鬧嘅場面。

不過唔明就算喇﹐實在無乜興趣探究呢個系列。

連我呢個超級粉絲都唔收貨

(觀影感想 十七)

我係劉鎮偉嘅超級粉絲。

佢近幾年嘅作品﹐例如《越光寶盒》﹑《機器俠》﹑《出水芙蓉》﹐我知道大部份人都覺得

好爛﹐但係我依然從中搵到啲樂趣。

不過﹐去到呢部《東成西就2011》﹐就真係連我呢個超級粉絲都唔收貨。

唔知道其他劉鎮偉嘅粉絲又覺得點呢﹖

觀影感想 之 未觀就有想

(觀影感想 十八)

成龍一直以《十二生肖》係佢最後一套動作電影嚟宣傳﹐不過最近就透露接咗史泰龍套《THE EXPENDABLES 3》﹐仲研究緊《RUSH HOUR 4》個劇本。

所以話﹐藝人講嘢﹐真係聽吓就算﹐無謂太認真﹐show business嘛。

講番《十二生肖》﹐我未睇﹐只係睇咗個trailer。

都係果幾度板斧啦﹐熟口熟面嘅動作﹐熟口熟面嘅表情......

入戲院就免喇﹐出碟我先睇啦﹐反正成龍話佢有世界票房﹐都唔會志在我呢個香港觀眾啦。

一代宗師 之 兒女情長

(觀影感想 十九)

— 其實係愛情片(其實王家衛有邊套唔係﹖)

— 整齣電影有點支離破碎(again﹐其實王家衛有邊套唔係﹖不過有時支離破碎得好﹐有時支離破碎得唔好。今次我覺得係唔好。)

— 王家衛的技法值得欣賞﹐不過喺佢啲舊作已經欣賞過好多次......

— 現在上映的版本有點像半完成品﹐難怪有傳聞遲啲會有個終極版

— 唔係好覺梁朝偉嘅演出同喺其他王家衛嘅電影有太大分別(應該係導演的問題﹐非演員之罪)﹐所以當《一代宗師》裡面嘅葉問穿起西裝拍照﹐觀眾都想起周慕雲(同場有觀眾笑出來)

— 肯定有參考過葉偉信嘅《葉問》同《葉問2》

— 暫時係得咁多感想

又說一代宗師 之 點點點滴滴滴

(觀影感想 二十)

— 已經太多人講呢套戲﹐如你覺得厭倦﹐可立即離開此頁面

— 咁多人講﹐完全在王家衛意料之內﹐掌控之中﹔王家衛從來就精於計算

— 真係唔覺梁朝衛演得好﹐我甚至覺得佢好多時都唔係好知點演(如果稍為知道王家衛的拍戲方法﹐呢個其實唔會太意外)

— 以現在公映的版本來說﹐完全無必要用宋慧喬(除咗好成功地為電影又製造了一些話題......)

— 如果唔係有《葉問》在先﹐我幾肯定王家衛的《一代宗師》還在籌備階段﹐而且好可能係永遠停留在籌備階段果隻

— 之前有傳聞話會有個四小時終極版﹐後來王家衛否認。唉﹐是但啦﹐誰猜得透王大導心思呢﹖沒有四小時﹐也可以有三個半小時。沒有「終極」﹐也可以有「過渡」。之前誰又估到《東邪西毒》會推出終極版呢﹖

— 的確現在又沒必要推出四小時終極版﹐反正現版本越模糊就越多空間以供解讀﹐越多人解讀就越引到更多人睇(甚至睇多幾次﹐還不正中王大導下懷﹖)

— 雖然有大把人講呢套戲﹐但係我最有興趣知道佢點諗嘅就只有三個人﹕舒琪﹑邁克﹑四維出世(不過三位都好似未出手)

— 暫時係得咁多感想

— 即係唔排除日後會有其他感想﹐是的﹐王家衛這人和他的電影係特別令人有特別多的感想