(真人真事改篇)
“阿Joe﹐857吖﹐$7.50﹐攞一萬。”李生吩咐。
我立即入機。奇怪﹐攞唔到。原來個價低咗﹐而家即攞係$7.49。
“李生﹐$7.49喎。”
“照攞啦﹗”李生提高聲量﹐聽得出有啲唔耐煩。
做新人時就係咁stupid。個客話$7.50買﹐如果個價低咗﹐使鬼問人要唔要平啲咩﹖咪用個平啲嘅價幫人買囉。沽貨亦係一樣道理。
“李生﹐$7.49﹐入齊一萬。”
“Annie﹐$7.49﹐入齊一萬吖。”李生喺電話覆個客﹐然後﹕“喂﹐阿Joe﹐你呢啲下次唔使問架喇。OK? 唔係第一次架喇。”
晨早流流﹐就俾經理“吉”一嘢﹐真唔老黎。
其實我都知唔使問嘅﹐只係始終重係有啲緊張﹐重係有啲騰雞。做呢個位﹐最怕就係未熟部機﹐成日怕㩒錯制﹐做錯盤。無耐之前又俾李生照咗次肺﹐搞到個人心煩意亂﹐做起嘢上嚟就更衰多兩錢重。
經紀劉打入嚟﹕“388﹐三十蚊直入三千。”
“三十蚊入三千。”我一邊覆一次﹐一邊入機。頂﹐個價又係變咗。而家係$29.95。
我再一次入機。喂﹐個天係咪同我作對呀今日。個價又變﹐我又入唔到。
“喂﹐入到未呀﹗”經紀係從來唔會同我哋客氣嘅﹐尤其是嗰啲炒得大或者係客多嘅大經紀。
“入緊﹐入緊。”我額頭已經有少少冷汗。老鬼全哥見我兩次都未入到隻388﹐就話﹕“喂﹐個價跌緊呀﹐人哋話三十蚊﹐你咪用E盤掃囉。識唔識呀﹖“special”, “buy order”﹐“type”嗰度要打個E呀。你快少少啦﹐唔該。”
“special”同“buy order”都係keyboard啲制。E盤嘅意思係“Enhanced limit price order”﹐
中文即係“增強限價盤”。開緊市時﹐最多可以掃五個價位﹐或者隊低五個價位。唉﹐我其實係識嘅﹐不過臨場真係唔夠practice。
幾經艱難﹐我終於入到喇。
“$29.90入咗六千﹐$29.95入咗四千﹐前後一萬。”
“喂﹐大哥﹐你搞邊科呀﹖慢到……”經紀劉未講完就收線。轉頭﹐李生個電話就響﹐“係﹐係﹐明﹐我會同佢講講……佢重新……好﹐好﹐拜拜。”
肯定係“pop”我啦﹐唉。
兩點半﹐好辛苦等到放lunch。今日約咗公司個“行街”(如不知道何謂“行街” ﹐可參閱“交收部的一天”) 一齊食。
我哋公司有兩個行街。一個精甩辮﹐一個笨過隻牛。今日同我食lunch嘅係精甩辮嗰個﹐叫長毛Cal﹐Calvin個Cal。不過呢個唔係真名﹐佢有幾個名﹐啲wet仔好興有幾個名﹐呢樣嘢都係後來另一個同事話我知。呢個長毛Cal﹐奇人一名﹐有時間再慢慢講你聽。
“點呀﹖盤房做成點呀﹖”
“有乜點啫﹐咪一鑊粥囉。”
“你落去無幾耐咋嘛﹐慢慢嚟啦。”
“你係咁諗﹐個阿頭唔係咁諗呢。”
如此這般﹐講吓公司是非﹐就食完個lunch喇。
返到盤房﹐見到李生同Gary密斟。Gary就係坐我左邊嘅同事﹐喺“交易部的一天” 出現過﹐唔知你重記唔記得﹖
好明顯﹐係講緊我﹐因為兩個人嘅視線都係向住我﹐而我好肯定我個頭係無生菠蘿。
我若無其事走返埋我個位。
“阿Joe﹐你暫時唔使接經紀劉啲盤﹐Gary會幫你接住先。”
“哦。”
賴晒嘢啦。經紀劉嫌我唔夠好﹐要換人﹐唔想我接佢啲盤。
Gary好心安慰咗我兩句﹐叫我慢慢適應盤房嘅做事方法。我多謝佢﹐但同時知道安慰係無用嘅﹐要做得好呢個位先有用。
下午﹐我已經好小心好小心﹐但係都係錯咗個盤。(天呀﹗)
我真係黑到貼地﹗
收市﹐正當我入緊trade入公司個system嘅時候﹐突然有人輕輕拍我膊頭。
係李生。
佢壓低聲線﹕“喂﹐入房傾兩句。”
入到會議室﹐李生沉默咗一陣﹐我當然係等佢開口啦﹐鬼咁唔自然。
“阿Joe﹐你覺得你工作上有乜問題﹖點樣可以改進呢﹖”
我已經唔記得當時我點答﹐我淨係知道李生有樣本事﹐就係佢可以唔理你講乜﹐然後自己顧自己繼續講落去。
“其實你都做咗半個月有多啦﹐點可以重成日錯盤﹖上面問我做乜咁多錯盤﹐我都唔識答喇真係。你話你想做呢個位﹐ok﹐公司梗俾機會你﹐但係你都要諗吓做唔
做得嚟。好似今日咁咋嘛﹐個AE(account
executive﹐即經紀)落個盤﹐好簡單啫﹐你都搞咁耐。呢個位要做到啲AE覺得你得﹐要做到啲客覺得你得﹐先得。我知唔容易嘅。”
想像吓你係我﹐呢番說話係咪唔係咁好聽呢﹖我話你知﹐我已經將原裝版本修改咗﹐省略咗。總之﹐當時嗰番說話好discourage﹐擺明叫我走人。
我嘅屈辱就好似<英雄本色>嘅Mark哥。
Mark哥話﹕“我以後都唔要俾人用槍指住個頭﹗”
而我個心裡面亦模仿Mark哥說﹕“我以後都唔要俾經理照肺﹗我一定要做好呢個位﹗”
(待續)
(嘻﹐自比Mark哥﹐有啲誇張啦﹐不過有戲劇效果嘛。)
原文發表於2009年12月17日
沒有留言:
張貼留言