(真人真事改編 文中出現之股票號碼或價位未必與現實相符)
星期六﹐返半日工。
你有無聽過股票行要返五日半工吖嗱﹖呢間公司真係有啲騎呢。
星期六無市﹐Settlement都可能有啲嘢搞吓嘅﹐例如有啲客嚟交貨﹐Dealing就真係無嘢好做囉﹐簽完名之後啲同事通常“了”出去食早餐。唔使講﹐個早餐梗係食好耐啦﹐食完就睇情況﹐閃到嘅咪閃囉﹐阿頭都唔會揸到咁正。
有陣時呢﹐星期六會有模擬開市﹐主要目的係交易所想做吓testing。交易所會事先俾份通告我哋啲經紀行﹐我哋跟住通告嘅指示入機就得。
“阿Joe﹐今日有試機。啱喇﹐你當練習啦。”李生放低份通告喺我檯面。
唔使你講我都會練啦。掉咗嚟Dealing差唔多成個月﹐俾你照咗兩次肺﹐插過無數次﹐你估我唔想快啲上手咩﹖真係做唔嚟﹐老實講﹐我都無面目坐喺盤房度啦。
今日分行經理過咗嚟﹐佢叫Benny﹐三十幾歲﹐年青有為。Benny之前都做咗好耐盤房﹐所以我咪乘機請教吓佢囉。
“嗱﹐你做盤嘅﹐最緊要小心。聽清楚啲人講乜﹐覆一次﹐咪入機囉。記得一單還一單﹐做緊嘢嗰時﹐其他電話響就由佢響﹐接唔到都無辦法﹐無人怪你﹐完成咗手上嗰單先。有唔清楚嘅﹐問多次﹐寧願俾人話煩﹐好過做錯﹐做錯就盞俾人“啡”㗎啫……”
嗰一日Benny過咗好多心得俾我﹐又帶住我模擬開市咁做嘢﹐幫我改進。
_ _ _ _ _ _
多謝Benny﹐經過星期六嘅練習﹐真係進步咗。
星期一﹐開市。
“231062入兩萬吖。”個經紀打嚟落盤。
你聽唔聽得明佢噏乜﹖我就唔明喇。到底係231﹐$0.62入兩萬吖﹖定係2310﹐$6.20入兩萬﹖定還是係23﹐$10.62入兩萬﹖又或者係2310﹐$62入兩萬呢﹖
有啲人落盤就係咁﹐講嘢無停頓﹐又以為人知佢噏乜。以前我估估吓﹐唔多敢問。但係Benny教落﹐無須同佢客氣﹐問清楚先。
“喂﹐你噏乜呀﹐講清楚啲啦。”
呢次係我第一次兇返經紀轉頭﹐哈哈﹐又幾好效果喎。其實有時我哋做錯嘢﹐唔係我哋錯晒﹐啲經紀呀客人呀都有啲責任。
“3988幾錢呀﹖”個客打嚟問。
“$3.97﹐$3.98。”我答。
“$3.75排入五千吖。”
“未排到呀﹐最多二十個位㗎咋。”做唔到嘅直接話做唔到﹐都係Benny教嘅。
其實入到機嘅﹐不過離價太遠﹐要入兩次。開市時我哋唔會幫人入呢啲離價太遠嘅盤﹐費事阻住做嘢。
中咗個盤﹐覆經紀﹐“66﹐$16.00﹐入齊一萬。”
“一萬﹖我唔係話八千咩﹖”
“你話一萬喎。”
“無理由……”經紀張嘅語氣好似好肯定。
“唔使拗喇﹐check錄音。”我打斷佢﹐然後收線。
Benny話遇到啲咁情況﹐無謂多講嘥時間﹐先check錄音﹐有證有據。公司啲錄音係交收部嘅Supervisor管嘅﹐即係Eddie。我打俾佢﹐話佢知個落盤時間﹐佢就會同我check。
Check完﹐果然係我啱。經紀張呢條友﹐收好多客﹐自己又大懵﹐一忙起上嚟就搞亂啲盤。
“喂﹐聽咗錄音喇﹐你落一萬嘅。使唔使平番佢﹖”
“算喇﹐算喇﹐我要咗嗰二千。”講到鬼死咁勉強﹐其實個價升咗上去﹐即刻沽番都有數(音﹕so)啦。
今日無錯盤﹐而且做嘢爽手咗好多。
_ _ _ _ _ _
大概再做多兩個月﹐我終於可以好似其他同事咁﹐能夠瀟灑又有型咁入機喇。
之後都無再俾李生照肺。不過就有啲衝突啦有時﹐最“爆”一次重驚動到GM添﹗
(新丁的日子 完)
原文發表於2009年12月23日
沒有留言:
張貼留言