“喂﹐老陳﹐你話上海能唔能夠成為國際金融中心﹖”
“得﹐一定得。想當年李福兆搞遠東會﹐第二年生意就好過班老外嗰間歷史悠久嘅香港會。只要再無AB股之分﹑只要人民幣可以自由兌換﹑只要嗰邊法治拍得住香港﹐以中國人嘅智慧同靈活﹐我無理由懷疑上海唔能夠成為國際金融中心噃。”
“咁幾時呢﹖係咪國務院定嘅2020年呀﹖”
“要成為國際金融中心就一定要開放市場﹐但係開放之後會有乜嘢事發生呢﹐就真係木宰羊咯。你睇香港﹐太遠嘅就唔講喇﹐亞洲金融風暴﹑科網泡沫﹑重有最近呢
單金融海嘯﹐有邊次唔係俾外圍影響﹖邊次唔使付出沉重代價﹖溫家寶總理話齋﹐一個小問題乘十三億就係大問題。大陸股民就無十三億﹐不過都億億聲啦。開放市
場﹖隨時影響國家穩定呀。”
“你咁講﹐上海即係no hope啫。”
“又唔係噃﹐你都有留意新聞啦﹐中央政府做得幾好吖﹐逐步開放。之不過係咪到咗2020年中國就會完全開放金融市場﹐上海就真係成為國際金融中心﹐呢個就
天曉得喇。又或者好似張大教授五常話﹐中國嘅經濟制度係史無前例﹐分分鐘上海會發展成一個同而家西方主導不一樣嘅金融中心哩。”
“話時話﹐我早兩日上信報個網﹐睇到黃遠輝段片﹐佢有個幾有趣嘅point。佢話將來可能再無上海香港深圳之分﹐整個中國就只有一個金融平台……”
“我都有睇呢段片。技術上係可行嘅﹐不過就正如佢所講﹐簡單如過關﹐都傾唔掂數﹐要一地兩檢﹐更可況融合不同嘅金融市場。當年四會合併你話用咗幾多年﹖”
“呢個確係良好意願﹐不過又真係牽涉太多人和事。喂﹐老陳﹐講番一個我最關心嘅問題先。而家上海發展咁快﹐又有政策傾斜﹐驚唔驚我哋香港無得玩先﹖”
“忠伯﹐中國咁大咁多人經濟發展咁快﹐有兩個或以上嘅金融中心一啲都唔出奇。再講﹐香港已經係國際金融中心﹐對祖國好有利啫﹐中央政府唔會想我哋衰嘅。計我話﹐香港最重要係搵到自己嘅定位。”
“即係點呀﹐老陳﹖”
“即係一局棋﹐係生係死﹐就睇你點行喇。忠伯﹐你小心啲喇﹐我將軍抽車呀﹗”
原文發表於2009年9月15日
沒有留言:
張貼留言