交易部的一天

(真人真事改編)

九點都未到﹐我啱啱埋梗位﹐個機頭就響。

“早晨﹐幫我排沽幾隻嘢。3988﹐四個八毫半﹐沽五千。728﹐三個七﹐沽四千。1398﹐六個半﹐沽四千。5號仔﹐八十九蚊﹐沽八百。”

呢個經紀姓蔡﹐朝朝都係咁﹐一見我哋Dealing啲人返﹐就打嚟落啲個價離行離列嘅盤﹐慌死霸唔到頭牌。或者等我解釋吓﹐喺十點鐘正式開市前﹐九點半至 九點五十分係競價時段﹐理論上買家同沽家可以掛乜嘢價都得﹐可以成到最多股數嘅價就會成為十點開市時個開市價喇。頭先經紀蔡掛嗰啲係“競價限價盤”﹐ 如果成出嚟個價高過佢掛嘅﹐咁就會用高啲個價同佢沽。

咁而家你明佢做乜咁心急啦﹖呢條友成日想搏沽高啲﹐重想排頭位﹐做咗佢啲先。3988噚日收$4.48之嘛﹐你掛$4.85喎﹐$0.01一格﹐爭成廿幾格呀﹐大佬。所以呢條友啲盤成日做唔到㗎﹐間唔中先做到一單半單㗎咋。

入完經紀蔡啲盤﹐我就打開份報紙睇﹐通常十點前都幾空閒嘅。

“黐線﹐七萬蚊尺﹗”說話嘅係我同事Gary﹐坐我左邊﹐佢又係睇緊報紙。

坐我右邊嘅係Linda﹐佢就一邊食緊餐蛋麵﹐一邊補緊妝(唔好問我佢點解要兩件事一齊做﹐我唔知。) 。

我哋公司個交易部有十幾個人﹐有啲係期貨嗰邊嘅﹐唔逐一介紹啦﹐以後有機會再講。

九點五十分﹐對盤﹐個市跌咗289點。經紀蔡啲盤一個都中唔到。

十點鐘﹐開市。

“喂﹐個市點呀﹖”有客打嚟問。

“跌三百零五點。”我答。

“2800呢﹖”

“$21.05﹐$21.10。”

“幫我$21.05即出一千股。”

我飛快地入機。

“$21.05沽齊一千吖。俾個account number我吖。”

“何金水﹐1243067。”

收線﹐第二個電話又響喇。喺我檯面有四個電話係俾街客(註1)嘅﹐另外有部機係直接接駁公司啲經紀嘅。啲電話周不時會幾個一齊響﹐尤其是當個市急升或者急跌﹐啲人趕住入貨或者出貨。

十二點半﹐收市。做交易部一個好處係﹐有兩個鐘頭lunch。

話就話兩個鐘頭﹐其實兩點前要返到公司standby㗎啦。個市雖然未開﹐但係兩點鐘開始﹐可以取消之前掛嘅盤﹐改價就唔得。

兩點半﹐開市。

“喂﹐葉生﹐939吖﹐$5.80﹐幫我直入兩萬。”

“939﹐$5.80入齊兩萬。”

呢個客姓林﹐做廠嘅﹐炒得幾叻㗎﹐逢跌市呢就分段入貨﹐而且都係買大藍籌﹐幾萬股幾萬股咁買。呢﹐如果等陣再跌多幾百點﹐佢又會再買。不過學唔嚟吖﹐佢錢夠多﹐可以慢慢等。個市升番呢﹐佢就會分段放番啲貨。

我係做Dealing﹐不過唔係Prop Trader(註2)﹐我哋間公司亦無呢類位﹐所以工作其實都幾刻板﹐只係幫客戶execute個trade﹐最緊要係入機入得快而準。不過咁﹐做呢個位都學到唔少嘢嘅。

四點﹐收市喇。將今日做咗嘅trade入埋落公司個電腦system就放得工。

“咦﹐阿Joe﹐你寫緊咩呀﹖”交易部經理李生問。

“無﹐無呀。”我攞張盤紙遮住份稿。

唔好意思﹐做埋啲手尾先﹐有機會再傾過。


(註1) 有些客人選擇不要經紀服務﹐行內稱之為街客。但其實有沒有經紀﹐買賣股票所付佣金沒有分別﹐除非另行協議。

(註2) 通常投資銀行才會有的職位。公司給他們一筆資金﹐讓他們自行炒作。贏的話﹐分紅﹔輸錢﹐就要起身。

(小小後記﹕原本以為寫自己的工作容易不過﹐事實卻不盡然。隔行如隔山﹐怎樣令不熟識的讀者都能清楚明白呢﹖又﹐如果是印刷媒體﹐寫長一點加多些註解總能 解決問題。但blog呢﹖我想是不適合的﹐800字左右很盡了。寫這兩篇所花的時間比預期長太多。Anyway﹐希望對讀者還有些用處。)

原文發表於2009年11月30日