喂﹐有無睇過<竊聽風雲>﹖
覺得點﹖我就覺得好唔掂。
戲裡面啲高科技我唔識﹐無意見。但係關於股票市場啦喎﹐哼哼﹐我就有啲嘢講喇。
首先﹐套戲未免拍得啲經紀同啲散戶太天真太傻啦﹐見人哋買隻股票賺到錢就個個跟買﹖都唔緊要喇﹐的確好多人鐘意跟風。但係﹐買完之後﹐成堆人圍住個報價機
起哄﹖係炒股票呀﹐唔係賭緊馬呀﹐編導哥哥﹐你咪一味追求戲劇效果啦。今日嘅香港股民算得上相當成熟﹐呢啲場面或者二三十年前都真係會發生嘅。
二三線股有異動﹐差唔多日日都有啦﹐會唔會驚動到證監會主席呀﹖咪好唔得閒﹖無專責部門調查㗎咩﹖Okay﹐Okay﹐就當事態嚴重﹐證監會主席親身嚟同你班差佬傾﹐咁會唔會係喺天台先﹖編導哥哥﹐天台傾計真係咁型咩﹖唔好成日咁<無間道>啦﹗
最令人難以相信係﹐吳彥祖同古天樂呢兩個角色﹐兩個生活喺香港呢個金融中心嘅成年男人﹐竟然好似第一次開股票戶口﹐第一次買賣股票。喂﹐97前紅籌熱﹐00年科網熱﹐重有最近呢個07牛市﹐斷估你都有戶口抽吓新股呀﹖聽到個內幕消息先急急忙忙去股票行開戶口﹖
吳彥祖又係嘅﹐個角色都應該係個聰明人吖﹐做世界前都應該做吓資料搜集啩﹖一“hum”過大大手買啲細價股﹐容乜易查到你呀﹐查唔到先奇啦。要儘量做到不著行跡﹐方法唔係無……不過﹐都係費事講﹐啲內容唔知出唔出得街。
總之﹐吳彥祖同古天樂喺套戲裡面都好stupid﹐姐手姐腳咁﹐搞到一鑊粥都合乎情理嘅﹐或者呢點先係成個劇本最唔犯駁嘅地方啦。真係要食大茶飯﹐搵幾個<信壇>壇友度吓橋﹐分分鐘勁過佢兩個。
其實聽故唔應該駁故嘅﹐但係啲細節咁唔可信﹐我好難投入個故事噃。
我強調我係港產片迷﹐不過睇<竊聽風雲>﹐我就寧願睇番成廿年有多嘅Oliver Stone嗰套<Wall Street>喇。
原文發表於2009年12月2日
沒有留言:
張貼留言