交收部的一天

(真人真事改編)

九點鐘返到公司。第一件事打開份report﹐點吓啲股票﹐睇吓齊晒未。OK﹐齊晒﹐交俾“行街”(註1)。

電話響﹐交收部阿Head打嚟搵Eddie﹐即係“掃把”(Supervisor)。多鬼餘﹐明知條友簽完到﹐老馮出去食早餐﹐無九點半都唔會見人﹐又點會搵到佢。

“咁阿Joe你幫我追追AE11(Account Executive﹐即經紀)條數﹐重有佢啲客。”

睇睇report﹐都未到T+2﹐使乜咁緊張。不過呢個AE個底唔多好﹐出名鐘意拖數。

“喂﹐你琴日買咗啲2628要找數喎。重有你啲客呀﹐遲咗要計息就唔好啦。”

“得啦﹐得啦。”AE11語氣唔多友善地答。Settlement個位真係唔多好坐﹐上面就叫我哋追﹐追呢就啲人唔nike﹐俾人鬧返轉頭都唔出奇。

朝朝都要“溫馨提示”人找數﹐例行公事。十點左右﹐有客嚟攞貨。呢個客叫黃太﹐好鬼得意﹐成日提現貨﹐無耐沽咗又存番入嚟。其實佢應該知道有樣嘢叫“投資者戶口”(註2)㗎﹖射貨咪得囉﹐費用又平啲﹐攞嚟攞去﹐唔見梗份現貨就麻煩啦﹐又要報失﹐又要登報…….

啱啱招呼完黃太﹐經紀張就走入嚟。唔使審﹐肯定又係錯盤啦。

“我琴日啲飛仔寫錯account number﹐麻煩幫我改番﹐唔該。”

你就一句“唔該”﹐我就要走去盤房攞疊盤紙﹐搵你條trade出嚟﹐又要影印﹐又要填form﹐又要搵人聽錄音證實你個客落過盤﹐搞完一大輪﹐先可以喺電腦個system度改。拜託錯少啲啦﹐大哥。

搞掂個錯盤之後﹐趁空閒﹐做住暫時收到嘅支票同啲客fax嚟嘅銀行收據先。好簡單﹐用公司個system check吓個客找邊條數﹐check到嘅就打入個excel file。滿一份喇﹐就print出嚟﹐交俾Eddie。我係maker﹐Eddie係checker﹐check過啱嘅﹐佢就會將啲數入公司個 system﹐咁聽日個report就唔會見到個客爭錢喇。

做呀做呀﹐做到一點鐘﹐食lunch。

兩點鐘﹐食完。一返到嚟﹐凳都未坐暖﹐就有客嚟交貨。對吓身份證個名同股票上面個名﹐無問題﹐開張收據俾佢﹐走得。其實今年無07年咁旺﹐少咗客人上嚟交貨﹐做少好多嘢。回想07年﹐一日隨時收過百份現貨﹐我淨係幫客填轉手紙都填到手跛。日日OT到九點幾﹐唉。

追數呀﹐追貨呀﹐呢啲最重要嘅基本上上午已經做完。咁下午有乜做呢﹖其實交收部嘅工作好“林審”(正字點寫﹖)﹐我講都講唔晒你聽﹐有時重會有啲奇難雜症。

四點鐘截數。即係再有支票同啲fax﹐都留番聽日做喇。今日收嘅支票呢就交俾“行街” 攞去銀行入。啲現貨呢就mark落薄﹐Eddie點過之後就鎖入夾萬。

五點半收工﹐又一day。

(註1) 行街﹐俗稱﹐主要負責去過戶處﹐去銀行﹐去稅局等等﹐勞苦功高﹐偏偏人工最低﹐而且通常得不到應有嘅尊重。

(註2) 港交所的一項服務﹐不錯的﹐散戶可以上港交所網站了解一下﹐又或者問問幫襯開嘅股票行職員。

原文發表於2009年11月28日