交易部新丁的日子

(真人真事改編)

交易部﹐又稱盤房。

三年前我由交收部轉咗去交易部。

“頂﹐又錯盤﹗”我心裡暗罵一聲。

“李生﹐錯咗個盤。2328﹐買大咗一萬。”如果你睇過<交易部的一天>﹐你可能會記得李生就係交易部經理。盤房做錯嘢就係咁﹐要第一時間﹐重要大大聲話俾阿頭知。即係全個盤房都知﹐我已經見到Linda個不屑嘅笑容。

李生塊面黑過墨汁。但係你唔怪得我吖﹐我嚟第二日就要埋位﹐乜practice都無﹐嗰個keyboard同平時用開嗰啲又唔同……

“現價即沽一萬﹐平番佢。”李生嘅語氣可以用一個字形容﹕冷。

今朝個市唔知做乜﹐跌得鬼咁急﹐說話中2328已經跌咗十幾格。我$3.20買多咗10,000股2328﹐$3.06平番。呢單公司蝕千零蚊啦。有時好彩﹐做錯盤會有錢賺㗎。不過錯就係錯﹐一樣俾人柄。

放lunch﹐全哥走過嚟﹐細細聲同我講﹕“X﹐阿Joe﹐無理由㗎喎﹐咁都重錯得﹐咪教過你......”X係乜嘢字﹐相信唔使我開估。係﹐做盤房啲人一般都幾爛口。全哥係盤房嘅老鬼﹐新人通常都係佢教。呢個lunch少咗廿分鐘﹐因為俾全哥捉住上咗個堂。

兩點半﹐又開市。

一開市急跌二百幾點﹐啲電話響個不停﹐最慘係幾部一齊響。熟手就話無問題啫。

“喂﹐你入到未呀﹗快啲啦﹗”個經紀喺電話度咆哮﹐我就更加亂﹗

全哥見唔對路﹐一手搶咗我個電話。

“係﹐係﹐2318﹐攞五千。個價跳得好快﹐同你掃高兩格好嘛﹖好﹐$23.35入咗兩千﹐$23.40入咗三千﹐入齊五千吖。”

做完﹐佢一手塞番個電話俾我。

我全日嘅工作都唔多順利。呀﹐唔係﹐應該話係嚟咗盤房兩個星期都未順利過。

收市﹐李生捉咗我去會議室。

“阿Joe﹐做咗兩個星期喇﹐你覺得點﹖”我都未開口答﹐佢就繼續講﹕“其實盤房有時都幾大壓力﹐未必人人啱做。開緊市個個都忙﹐唔得閒吓吓睇實你。無所謂㗎﹐如果你覺得唔適合﹐可以做番交收部㗎。你認真諗諗啦。”

李生拍拍我膊頭就走出會議室。

我個心就諗﹕“咪玩啦﹐我考咗HKSI(註1) 三張paper先攞到個dealing in securities嘅牌﹐再要去考AMS/3(註2) 個試先做到盤房個位﹐你要我返番settlement﹖”

我點都要做好呢個位㗎喇……點知後來有更大鑊嘅事發生。(待續)


(註1) HKSI﹐Hong Kong Securities Institute﹐香港證券專業學會。

(註2) AMS/3﹐the third generation of the Automatic Order Matching and Execution System﹐第三代自動對盤及成交系統﹐港交所現在使用的一套系統。

原文發表於2009年12月10日