一些想法(3)

關於投資的一些零零碎碎的想法﹐這應該是最後一篇。

– 投資又好﹐追女仔又好﹐其實做乜都好﹐最重要係呢兩個字﹕“時機”。

– 最重要嗰兩個字﹐亦係最難嗰兩個字。所以話﹐呢個世界邊有容易賺嘅錢。

– 信心唔夠嘅時候﹐看不清局勢嘅時候﹐就寧願唔下注。現金係唔會咬人嘅。

– 你有無發覺﹐有一類人鐘意分分秒秒做決定﹖玩短炒嘅人往往就係呢類﹐佢哋嘅心理可能係想證明自己啱﹑比別人叻。要小心呢種心理。

– 炒股票叻﹐到底有幾叻﹖真正嘅叻係﹐做實業做到上市﹐可以印股票。咁就係叻喇﹗

– 唔好連最簡單嘅事情都未搞清楚﹐就走去搞啲複雜嘢。好簡單嘅道理﹐好多人就係唔明。

– 只要加一層(疑似)科學嘅包裝﹐大部份人就唔敢用常理去challenge吓。財經界有啲(疑似)專家最叻就係玩呢套。

– 有無睇過古龍嘅小說﹖江湖百曉生係奸嘅。現實世界﹐尤其財經界﹐百曉生係咪奸嘅我就唔知﹐不過乜都可以即刻答重好似好有研究嘅就肯定流流哋。

– 好多人都話“價值”和“價格”是有分別的。係﹐的確係有分別。但係﹐等我俾個問題你諗諗﹐如果沒有“價格”﹐我們能說得清什麼是“價值”嗎﹖

– 賬面上嘅輸贏叫“floating”(浮動)﹔沽咗要埋單計數嘅叫“realized”(實現)。整天為那些浮動的事情煩心﹐其實是很不化算的。你明我意思嗎﹖

原文發表於5月14日