假如讓我設計香港館

看電視新聞介紹世博香港館﹐嘩哈哈﹐我完全唔知佢搞乜。

香港館裡面有幾個藝術團體﹐搞了些藝術表演。又唱歌又跳舞﹐據聞好代表到香港。咳﹐咳﹐可能我唔識藝術﹐我真係睇唔明。不過咁﹐大家香港人﹐不妨坦白﹐你上次特登睇藝術表演又係幾時呢﹖(喺西洋菜南街睇少女模特兒唔算呀。)

我身為香港人﹐我話﹐呢個香港館唔代表我。如果由我設計﹐香港館會係咁嘅﹕

– 最大﹐最高

我會將香港館做到最大最高﹐一振我哋香港人嘅士氣。你一定覺得奇怪﹐點可以大過又高過我哋祖國嘅中國館呢﹖哈哈﹐有乜唔得﹖只要用嘅係建築面積﹐再加一招 跳層﹐咁就得過潔廁得。建築面積計入附近停車場同埋成個陸家嘴﹐重唔係最大﹖館嘅第二層就係88樓(幾好意頭﹗)﹐第三層發上加發再加個8﹐即係888樓 (更好意頭﹗勁﹗)﹐如此類推﹐重唔係最高﹖成本斗零都唔使加﹐就做到最大最高﹐我都覺得自己係天才。

我唯一擔心係﹐條橋俾其他館抄咗去。到時鬥大鬥高﹐鬥出場口水戰。

– 抽新股表演

唱歌跳舞唔係代表唔到香港﹐不過麻煩搵幾個唔識唱歌唔識跳舞嘅人嚟﹐唱live唱到無氣兼走音﹐跳舞跳到好似做甩手操﹐咁先反映到我哋娛樂圈嘅水平嘛。

其實﹐要介紹香港﹐何不搵班臨記表演扮排隊攞form抽新股﹖話晒香港都係國際金融中心。搭個銀行景出嚟﹐整條人龍﹐近門口處放幾部大利市機﹐最好就有五 六個師奶圍住﹐久唔久搶機用﹐鬧吓交﹐開埋拖﹐幾咁熱鬧呢。然後香港警察出嚟平息事件﹐落幕。每半個鐘頭表演一次﹐保證旺場。

– 示範單位

據非正式統計﹐香港人最愛嘅活動係睇樓﹐其次係排隊等位食迴轉壽司。所以香港館裡面會有示範單位。示範單位可以向各香港發展商招標。假戲真做﹐順便賣樓。香港四大物業代理派出經紀﹐紅黃藍綠﹐色彩繽紛﹐示範人海戰術﹐於售樓處兜客。逛世博﹐買港樓﹐皆大歡喜。

也好讓世界各地遊客欣賞一下香港發展商如何發揮創意﹐運用空間﹐將不可能變成可能﹐將豆腐潤變成足球場。

– 化外牆為商機

香港館長方形﹐四面牆正好用來做廣告。世博搞成半年有多﹐估計有七千萬遊客﹐再加二千萬上海本地人﹐嘩﹐你話個外牆廣告值幾錢﹖廣告收益注入全港打工仔MPF戶口﹐鞏固香港國際金融中心地位﹐上海新加坡難望項背﹐紐約倫敦遲早唔係我哋嗰皮﹐香港明天更好。

以上概念所花無幾﹐有啲重有錢賺。香港政府﹐下次有乜國際盛事﹐隨時搵我﹐保證做得好好睇睇﹐好睇過當年搵紅鬚綠眼搞嘅維港巨星匯﹐好睇過用百幾萬銀兩請設計師加幾條絲帶嘅飛龍標誌。Yeah﹗

原文發表於2010年5月2日