全哥話

(真人真事改編)

全哥﹐以前都提過﹐唔知你記唔記得﹖

佢係公司老鬼﹐萬能老倌﹐重係公開叫價嗰時已經做緊出市﹔盤房邊位同事sick leave佢就頂上﹐股票又得﹐期貨期權都得﹐得咗。幾年前我pass到AMS個試都係全靠佢事前指點。

今日飲茶﹐佢老哥興起﹐同我講以下一番話﹕

“嗱﹐你而家喺屋企﹐有賊佬入咗嚟﹐個賊佬拿住把刀指住你﹐重色迷迷咁望住你老婆﹐嘩﹐大X鑊﹐你重有個細路喺度添﹐你點做﹖

“你醒起﹐你食過夜粥噃﹐男兒天職保家眷﹐X﹐同個賊佬死過啦。嗱嗱嗱﹐呢啲生死關頭嚟㗎﹐打贏梗係好啦﹐打輸﹐嘿嘿。呢個時候你又醒起﹐套路係就係打得 好熟﹐重虎虎生威添﹐但係從來無同人開過拖喎。唔單止咁﹐連教你個師父你都無見過佢真係同人打噃。呢個時候你會唔會唔敢出手呢﹖

“日日練套路無鬼用㗎﹐啲拳理俾你背熟晒都係廢。呢個moment﹐唔容許你花拳繡腿。你無真功夫﹐制唔X服到個賊佬﹐係咁先㗎啦。

“呢個世界好多人就係鐘意花拳繡腿﹐耍出嚟好睇吖嘛﹐型吖嘛﹐畢竟有幾何要同人生死相搏吖﹖重有呀﹐有啲師父﹐明知自己套嘢唔得﹐夠膽死設館授徒。不過咁﹐你又千祈咪踢爆噃﹐叉倫住吓都唔好噃﹐人哋靠嗰套搵食﹐你話人唔得﹐真係同你搏命㗎噃。

“阿Joe﹐你收唔收到﹖”

“完全收到。”我邊食叉燒包邊答﹐“整舊蝦餃先啦﹐趁熱呀﹐全哥。”

原文發表於2010年7月31日