形勢

(延長交易時段﹖二之一)

閱報得悉﹐港交所正考慮是否要延長交易時段﹐並取消中午休市。

調整交易時段影響每一位投資者﹐不可不察也。

投資就是要審時度勢﹔不如就先看看現今香港股市之形勢。

港交所把證券交易商分成三組﹐分別是A組﹑B組和C組。到底依據甚麼準則來分組的呢﹖答案是﹕交易額。佔交易額最多的頭十四名交易商歸入A組﹔第十五至六十五名歸入B組﹔第六十五名打後的全歸入C組。

以本年四月為例﹐A組佔該月總成交額51.58%﹐B組佔35.54%﹐C組佔12.88%。單看百分比無甚意義﹐要睇埋該月總成交額係幾多﹔答案係 ﹕$1,333,740,000,000.00(註)。如果以最普遍嘅0.25%佣金計﹐該月總佣金收入係$3,334,350,000.00。

用個比喻等你易明啲。交易額就好似件餅﹐而家嘅形勢係﹐A組起碼食一半﹐B組食大概35%﹐剩低不足15%就係C組嘅。其實呢個比率已經維持咗好多年。還 有一點要注意﹐牛市時件餅重大﹐而且有時A組可以食到超過六成。至於A組係邊啲公司呢﹖你無估錯﹐就係高盛﹑大摩﹑野村呢類頂班投資銀行。

淨係來自香港股市嘅佣金每月都有幾十億喺條街度﹐重未計投行喺其他範疇嘅收入﹐而家你明白投行點解賺咁多錢未﹖

講咗咁耐﹐講到自己都覺得有啲煩﹐我無非想話你聽﹐喺資源上大行係有絕對優勢。延長交易時段﹖無論前線或後勤部門﹐都應該要增聘人手。A組財雄勢大﹐完全 唔成問題﹔莫講話延長﹐玩二十四小時都重得。B組﹐會辛苦啲﹐不過都可以應付得來。C組﹐估計大部份頂唔順經營成本上升。

我唔係住喺火星﹐自然知道汰弱留強呢個市場定律。我無意阻A組發達(點阻到呀﹖咪講笑。)﹐亦無意維護B組和C組之利益(人微言輕﹐實在亦維護唔到。)。本文想指出的是﹐贏家輸家好多時係遊戲規則決定。

投資者當然要留意遊戲規則之改變。就算你無投資﹐都應該留意金融市場之發展﹐因為喜歡或不喜歡都好﹐金融業確確實實影響著整個社會﹐而且影響得越來越大﹐越來越深﹐金融海嘯還不是一個最好證明﹖

應不應該延長交易時段﹖如落實執行﹐會帶來甚麼影響﹖投資者有甚麼事情要留意﹖這些將會在下一篇談及。


註﹕資料來自港交所網站﹐www.hkex.com.hk/eng/stat/epstat/exreport.htm

原文發表於2010年5月31日