一些關於愛情的想法

星期六﹐唔講財經﹐講吓愛情。只是我的一些想法﹐你絕對有權唔同意。

– 男人未必知道什麼是“愛情”﹐但肯定明白乜嘢係“咸濕”。

– 毋須什麼訓練﹐每個女人天生都係愛情專家。

– 男人結婚的時候﹐就係他對愛情已經無晒憧憬的時候﹔相反﹐女人結婚的時候﹐就係她對愛情最有憧憬的時候。

– 男人通常花心但唔狠心﹐好多時會覺得對前度女朋友或前妻有責任。女人通常唔花心但好狠心﹐話飛你就飛你﹐然後好快投入另一段愛情。

– 愛情唔到﹐左等右等﹐等極都係無。愛情一到﹐話嚟就嚟﹐快到你連心理準備都做唔切。

– 我到而家都唔明﹐點解有啲人搵男朋友或者女朋友喜歡列出一大堆條件﹖生活上有啲嘢唔使咁計算的。

– 如果你唔肯定係咪鐘意咗一個人﹐好簡單﹐問問自己有無成日掛住佢﹖有﹐九成係鐘意咗囉。如果傾計嗰時重有種暖洋洋嘅感覺﹐十成係呀。

– 到咗某個年紀(通常係三十或以上)﹐最關心你有無愛情滋潤嗰個可能唔係你自己﹐而係你阿媽。佢唔係真係關心你噃﹐佢想抱孫咋噃。(一笑)

– 男人同你講﹐唔想愛情影響事業。呢句肯定係藉口。(點解又無聽過男人講唔想性愛影響事業嘅呢呵﹖)

– 女人同你講﹐唔想事業影響愛情。佢係話大家都拍咗咁耐咯﹐不如結婚﹐然後佢辭職唔使做﹐你養。

– 真係有啲單身事業型女強人唔恨有愛情﹐唔恨有男人錫﹐我打死都唔信。

嗱﹐嗱﹐嗱﹐我都講明你有權唔同意咯。

 原文發表於2010年4月10日